2017-09-27 17:33
Fehler ausgebessert
Neue Begründung: Wos ned ois fia Emojis gibt: A rosarouds Einhorn, as Vulkanier-Handzeichen - du woaßd scho des mim Spock: "Leb lang und in Frien" - sogar an lachandn Scheißhaufa!
Aber die boarischn Leibspeisen gibt's ned! A Verhöhnung! Do weads hint häa wia vorn! Des kemma uns ned gfoin lossn!
Jetz zur Wiesnzeit kemman wieder Hundertdausend Touris vo da ganzn Wäid daher. Und wos essns aufm Oktoberfest? Richtig: Lebakas und Weißwiaschd! Des is nix provinziells, de ganze Wäid kennt unsa Kich!
Mit woffiaram Recht also gibt's nur Hotdogs, Pizza, Pommes und Sushi ois Emojies? Schmeckt des vielleicht besser ois zwoa gscheide Weißwiaschd mit am Hendlmeier? Oder a Lebakaassemme? Ja wirkle ned...
Es gähd um nix anders ois um die Pflege vo unsana boarischn Kultur - und de gibt's eben a 2.0 im Netz. Ned ummasonsd ko ma a de .bayern-Domain-Adress sichern. Mia san doch ned vo gestan!
Back mas o! Wemma gnua Stimman zam ham, schick ma unsa Petition ans Unicode-Konsortium im Silicon Valley.
De kümmern si dann scho drum. Und wenn ned, dann ruaf ma ganz om im Maximilianeum o - so gäht's jenfois ned weida!